【夏天,為大地帶來⋯⋯】四大家居散熱法寶

  • By
  • Doris Liu
  • August 29, 2017

香港嘅夏天熱起上嚟唔係講笑,三十幾度高溫又熱又焗。好多人會選擇外出避暑,例如去酒樓飲茶、去商場行街等等,都可以涼到冷氣,咁就唔使留喺屋企做「焗豬」。不過,日日出街都唔係辦法,等我哋一齊學習吓以下呢四個家居散熱嘅好方法啦!

  1. 種植物

種花草植物散熱嘅原理就係用植物嚟遮陰,陽光曬唔到入屋,屋內溫度自然就會降低。除此之外,植物進行光合作用嘅時候會吸走二氧化碳,並且放出氧氣。二氧化碳作為溫室氣體之一,會令熱氣冇咁容易散去,困住啲熱氣喺屋入面就會令間屋越嚟越熱。種植物可以有效減少屋內嘅二氧化碳含量,令間屋冇咁熱之餘,空氣仲會清新啲。

用植物嚟遮陰。圖片來源:PChome

2. 窗簾掛外面唔掛入面
好多人以為拉埋窗簾就唔會熱,但事實上冇咁簡單。太陽嘅熱穿過玻璃窗入到屋企入面,即使喺屋企入面拉埋窗簾,已經入咗嚟嘅熱氣並唔會走,變相窗簾拉咗等於冇拉,完全冇用。其實,只要改少少方法,將窗簾掛喺玻璃窗嘅外面就可以有效降溫。由於窗簾遮光,少啲太陽光可以穿過玻璃窗入到屋企,所以內部溫度亦都會低啲。

窗簾應該整喺窗外面。圖片來源:PChome

3. 窗戶貼隔熱膜
隔熱膜有一層反光紙,可以將陽光反射出屋外,室溫最多可以降低大約攝氏10度。貼咗之後,由屋內望出屋外會比較暗,但喺屋外望入屋內基本上係冇分別嘅。不過大家要留意,隔熱膜有唔同透光度可以選擇,如果透光度太低嘅話,雖然隔熱效果較好,但屋企要長時間開燈,唔太環保。

隔熱膜可以反光,從而達到降溫效果。圖片來源:蘋果日報

4. 用Low-E玻璃窗
Low-E玻璃嘅全名叫做「Low Emissivity Glass」,係一種鍍咗膜嘅玻璃。呢層鍍膜既可以阻隔太陽光紅外線所產生嘅熱能,又可以保持良好嘅透光度,一舉兩得。呢種玻璃比較貴,但可以幫我哋慳返冷氣費,長遠嚟講都算係抵嘅。

Low-E 玻璃。圖片來源:蘋果日報

希望以上呢4個方法可以幫到大家對抗炎熱嘅夏天啦!