香港五大Playgroup:有機會同Eason、李嘉欣同徐子淇BB同班!

0

香港人成日都話要贏在起跑線,造就學前教育playgroup成行成市。既然係咪都要俾錢,咁梗係搵一間有質素、有保證,小朋友又開心學到嘢㗎啦!今日就同大家介紹吓香港5間著名playgroup學校,分分鐘仲可以Eason、徐子淇bb同班㖭!

Kinder U @ 銅鑼灣 禮頓道

kinderu, 銅鑼灣

名牌銅鑼灣Playgroup,唔少名人仔女都曾經入讀,例如名模歐陽妙芝同埋琦琦個仔女都係學生之一,仲唔夠?傳聞千億新抱徐子淇個大女李晞彤都有入讀。當然作為精明嘅爸媽,梗係唔會為咗見徐子淇就亂報Playgroup㗎啦。Kinder U主張用右腦學習法,提供Playgroup同reading club課程(分為國學同英文閱讀),playgroup課程內容動有體操跳舞、靜有卡片學習英文生字同數學。Kinder U仲有直系學校,就係位於深灣同海怡半島Rightmind International Nursery and Kindergarten。

Kinder U:香港銅鑼灣禮頓道111號4樓全層

Kiddo Zone International Playschool @ 銅鑼灣 希慎道

kiddo zone, 銅鑼灣

又一間位於銅鑼灣嘅Playgrouop,Kiddo Zone標榜採用英式教育,課程係根據英國幼兒教育基礎去設計,適合6個月至6歲嘅小朋友就讀,連老師都係喺外國直接聘請,配合有趣嘅學習手法,塑造輕鬆學習嘅氣氛。學校著重小朋友嘅5Q發展:IQ(智商)、EQ(情商)、PQ(體力智商)、CQ(創意智商)同埋SQ(社交智商)。名人代表有大美人李嘉欣囝囝。

Kiddo Zone International Playschool:銅鑼灣希慎道一號901室

SPRING @ 灣仔 告士打道

spring, 銅鑼灣

日日都學abc、123、bo po mo fo,大人都悶啦,何況小朋友。位於灣仔嘅SPRING就主張小朋友應該從小發揮身體潛能,學校提供Supersport、Sensory、Cooking,以及最著名由澳洲引入嘅KindyRoo課程,小朋友可以喺過千呎嘅學校,透過平衝木、彈床等不同嘅遊戲形式,配合舞蹈同活動,訓練小朋友嘅肌肉協調、平衡力以及團體合作嘅精神。SPRING嘅裝潢亦都係一大賣點,學校以白、藍同青綠色為主色,大部份家具都係木製,令到整個環境變得溫和自然,小朋友當然更加有興趣參加啦!名人代表依然係李嘉欣囝囝⋯⋯

SPRING:灣仔告士打道181-185號中怡大廈3樓

創閱學 @ 中環天后太子荃灣

創閱學

成日都聽好多家長帶小朋友去playgroup學英文,咁中文又有冇得學呢?話哂依家中文fail都入唔到大學啦。創閱學嘅閱讀課程同普通話班就好符合一班家長嘅需要喇。課程適合3至6歲嘅小朋友,內容包括中文閱讀,英文發音以及記憶技巧嘅學習。創閱學係香港九龍新界都有分校,方便一眾忙碌嘅家長。名人代表有Eason同徐濠縈個寶貝女。

創閱學 中環:中環亞畢諾道3號環貿中心2105室

創閱學 太子:太子彌敦道750號始創中心21樓2125-2127室

Artco Gallery @ 九龍塘何文田

artco gallery, 九龍塘

想小朋友發展得好,唔單只要語文好,其他興趣都重要;再唔係現實咁講句,想入間出名嘅幼稚園、小學,其他技藝才能都好關鍵。例如吳君如同導演陳可辛個女就報咗Artco Gallery嘅兒童藝術課程。Artco Gallery喺九龍塘同何文田都有學校,主要都係做小朋友嘅藝術培訓,課程由繪畫、手掌畫、黏土、裁縫至陶瓷都有,一定搵到樣小朋友鐘意嘅興趣。

Artco Gallery 九龍塘:九龍塘嘉林邊道8A1地下

Artco Gallery 何文田:何文田亞皆老街124H號地下11號舖位A2室

NO COMMENTS