【住宅新潮流】開放式單位有利亦有弊

  • By
  • 千居 Spacious
  • July 28, 2017

開放式嘅格局近年越嚟越受歡迎,唔少樓盤都有推出開放式嘅單位。以往有開放式廚房,但依家進化到成間屋都可以係開放式,變成開放式住宅。Spacious千居今次會介紹吓開放式住宅嘅優點同缺點,各位可以睇吓開放式住宅係唔係自己杯茶。
優點一:屋企嘅空間更為寬廣通透
開放式設計可以大大提升空間嘅靈活使用性,令我哋可以充分規劃所有空間,避免浪費,而且省卻不必要嘅隔牆,會令屋企內部亮度變大,採光更好,於是睇落去更加寬廣同通透。

開放式設計令空間感更大。圖片來源:Searchome

優點二:屋企設計更為美觀
開放式住宅將幾個本來相對獨立嘅空間融合成為一個大空間,令呢啲空間嘅裝修風格互相融合,因此成間屋嘅裝修風格可以統一啲同埋協調啲。再者,唔要隔牆可以令住客嘅視野更加開揚寬廣。不論係自己睇,定係人哋睇,開放式住宅嘅設計都係好靚嘅。
優點三: 方便家人相聚
開放式住宅因為少咗隔牆,屋企人無論喺邊個地方都可以自在咁傾偈,營造一個溫馨安樂窩嘅感覺。又比如話有小朋友嘅家庭,父母未必可以時時刻刻喺仔女身邊,但開放式嘅格局就可以令父母即使離子女有段距離,都可以睇到佢哋做緊咩,一有危險就可以即刻叫停。

開放式格局有助家長照顧小朋友。圖片來源:Searchome

缺點一:裝修有難處
比如話廚房同客廳、主人房同客房等等,呢啲都係本來風格各異嘅獨立空間,保留番各自特色仲比較容易做到,裝修時每間房獨立裝修就可以啦。但開放式格局就難好多,一個無隔牆嘅巨大空間要將原本四五種唔同嘅風格融合起黎,仲要望落去無違和感,實在好考功夫。

全屋風格要一致先好睇。圖片來源:kknews

缺點二:開放式空間犧牲私隱
即使係屋企人咁親密嘅關係,有時都需要少少私隱。假設你依家住喺開放式住宅入面,你無論喺邊都會俾人睇到,其他人時時刻刻都知道你做緊咩,你基本上無秘密可以收埋。你會唔會覺得好大壓力呢?又會唔會覺得失去自由,好似籠中鳥咁呢?

感覺一舉一動都好似被人監視緊。圖片來源:cnews

缺點三:做嘢容易分心
華爾街日報(WSJ)曾經報導,即使開放式空間好安靜,但只要一個人視線範圍內有任何動作或活動,都會產生視覺上的干擾,令人唔可以專心做嘢。比如話媽媽煮飯、小朋友做功課溫書等等,都係需要專注嘅活動。喺開放式空間入面,雖然你好容易望到其他人做咩嘢,但你都同樣容易受到干擾,令你分神無法專注完成自己嘅工作。

開放式格局好容易令人分心。圖片來源:Chinese Academy of Learning Ability

睇完晒優點同缺點之後,大家可以根據自己情況諗吓,開放式住宅啱唔啱自己啦!