Ads Not Available

香港人成日叫天水圍做「悲情城市」,唔好諗到咁灰啦,天水圍都好多野玩架!

  • By
  • 千居 Spacious
  • November 25, 2015

相信大家睇完「天水圍的日與夜」後,都覺得「悲情城市」呢個名形容得好貼切,其實天水圍好多野值得睇值得玩,一定會為你帶來歡樂。想搵新嘅吃喝玩樂地帶?今個weekend一路北上啦!
tin shui wai tsui sing lau pagoda

欣賞香港現存唯一嘅古塔

大家有無聽過聚星樓?位於天水圍嘅聚星樓喺明朝洪武十五年興建,屏山鄧族第七世祖鄧彥通深信可以用古塔來鎮水災同改善地方風水。至於名稱嘅來源,鄧彥通聲稱佢發夢時見到啲星星聚埋一齊,然後跌落同一個地點,所以就喺嗰個位置興建古塔。
bookaccino tin shui wai 2

去Bookaccino嘆杯咖啡

香港人好鐘意飲咖啡,一得閒就會去cafe嘆杯咖啡,即刻post將latte相上Instagram,羨慕死人。雖然香港島成百幾間cafe,但大部份都濟滿人,好無mood。想享受cafe嘅寧靜舒適環境?一於去位於天水圍嘅Bookaccino嘆杯咖啡,食個蛋糕啦!呢間咖啡店喺商務隔離,啱晒啲書蟲!
bubble tent camping tin shui wai

試下室內露營,有得嘆冷氣

大家試過透明波露營未?位於天水圍嘅名樂漁莊提供香港唯一嘅透明波露營。呢個室內露營專為香港人而設,透明波設備齊全,包括雙人床同冷氣,啱晒香港嘅炎熱夏日啦!露營之外,探訪者仲可以喺名樂漁莊玩下射箭,充氣彈床同草地太空球!
tin shui wai hong kong wetland park

去香港濕地公園親親大自然

香港又逼又細,難免會患上城市焦慮症。大家趁假期得閒,去天水圍嘅香港濕地公園透透氣啦!政府喺1998年興建濕地公園,目的係為咗保護罕有嘅濕地同提供一個自然觀賞景點。香港濕地公園咁多靚景,最適合影畢業相或同你嘅另一半影返張合照!
tin shui wai kingswood richly plaza

去嘉湖新北江商場食紫薯雞蛋仔

紫薯雞蛋仔,試過未?有興趣試食嘅人士可以前往位於天水圍嘅嘉湖新北江商場。除左紫薯,仲有好多唔同嘅味道,例如oreo,紅豆同綠豆。食飽後順便行下街,買返啲潮衫。男士仲可以去上海式理髮店剪返個復古髮型!